Footer

Naglayus manen ti Metro Manila

Ni  Danny B. Antalan

(Umuna iti dua a paset)

 

 

Nagtudo… napigsa a tudo… ket 80 a porsiento iti Metro Manila ti narneb iti danum.  Dayta nga aldaw, Martes, Agosto 7, 2012 (8-7-12) nga isu ti nagmalmalangaan dagiti tattao… ta iti Genesis 8: 7-12 imbaon ni Noe ti kalapati no addan maaddakan a daga kalpasan ti 40 nga aldaw a nalayus ti lubong.

Kasla Ondoy, kinuna ti kaadduan… napigpigsa ngem Ondoy, kinuna met dagiti dadduma.

Kunam pay, nagbalin a taaw ti sibubukel a Manila ken nagbalin a purpuro dagiti nalalayog a pasdek.  Nagbalin a paltaw dagiti basura.

Awan ti bagyo… nepnep laeng.  Awan ti bagyo a kas iti bagyo iti Kamara iti panangipasada iti Reproductive Health Bill.  Awan bagyo a kas iti panakaitlog manen ti Pilipinas iti London Olympics 2012.  Awan ti bagyo a kas iti rikna ni Presidente Noynoy Aquino iti daytoy napasamak manen a trahedia iti pagilian.

Daytoy ti bales ti nakaparsuaan, 19 ti natay bayat a masursurat daytoy,  700,000 ti naibakuit iti agarup 614 nga evacuation centers,  607,941 a naapektaran ti layus ti naggian iti balay ti kakabagian ken gagayyemda.  Iti pakabuklan, agarup 1,230,813 a tao ti naapektaran.

Nagbalin a kasla taaw dagiti kalsada, kas ti MacArthur Highway, Maysan Road, North Luzon Expressways ken dadduma pay a pagdaldaliasatan dagiti lugan.

Nagbel-a dagiti danum iti dam  iti Ipo, Ambuklao, Binga, San Roque, La Mesa, Angat ken Pantabangan Dam, awan ti naaramidan dagiti agbambantay no di palubosanda dagiti danum ket daytoy pay ti nangpagrabe iti layus iti Metro Manila, ken dagiti kabangibang a probinsia a pakairamanan ti Bulacan, Pampanga, Laguna, Cavite ken dadduma pay.

Nagsubli manen dagiti  buya iti aglawlaw, idi nangdidigra ti Ondoy:  dagiti kotse ken lugan nga agtatapaw iti pagat-katao a kaadalem ti danum;  dagiti balay a mansion, pagadalan, ospital, malls, ken dadduma pay a pasdek a sinerrek ti danum ti umuna a kadsaaranna;  dagiti tattao nga adda iti bubonganda nga agur-uray iti mangisalakan kadakuada, sibabasada, agtigtigergerda iti lammin, mabisinda iti agtultuloy ken awan sardengna a panagtudo;  dagiti basura nga agtatapaw, mayan-anud nga awan masnop a pagturonganda;  dagiti bao, ipis, kuton ken ania ditan a nabiag nga agiinuna nga agbirok iti mabalinda a pagbatayan ta dida met kayat ti malmes.

Ngem ti kakaruan a buya, dagiti ubbing, nataengan wenno tattao a nakailad nga awanen iti biag kalpasan a nalmesda, nagkalambre, nagaburan wenno nakorienteda bayat iti layus. Dagiti buya dagiti sanikua ken alikamen nga awanen ti mamaay ken serserbina.

Iti daytoy a gundaway, nagbalin a patas dagiti marigrigat ken nababaknang. Narneb iti danum dagiti barong-barong iti squatter area wenno dagiti mansion iti first class subdivision.  Agpadada a nagpakni iti paset a di magaw-at ti danum … agpadada a dumawdawat ti tulong wenno panakaisalakan.

Awan ti trabaho iti sibubukel a siudad, pribado man wenno iti gobierno.  Awan ti basa dagiti ubbing iti elementaria, sekondaria ken kolehio.

Dayta ti layus iti Metro Manila.  Ngem kasla di pay napnek ti nakaparsuaan… ta adda pay narikna a ginggined, 5.3 magnitude idiay Negros Occidental, agarup ala una ti malem.

Anian a panangdidigra ti nakaparsuaan kadagiti umili!

(Adda tuloyna)