Footer

Naglibas a balud, natiliw sadiay Tarlac

STA. LUCIA, Ilocos Sur – Dua nga aldaw kalpasan ti panaglibasna iti pagbaludan, natiliw met laeng ti  maysa a balud ditoy sadiay Tarlac City a nagpainganna idi parbangon ti Enero 5.

Nagtinnulong ti polis-Tarlac City ken ti polis-Sta. Lucia nga indauluan ni OIC Chief of Police PSI  Ramil R. Mendioro,  a nangiwayat iti operasion para iti pannakatiliw ni Richard Hermosura y De Guzman, 20, awanan asawa, ken residente iti Barangay Burgos, Sta. Lucia, Ilocos Sur kalpasan a napatalgedan a nagpaing iti balay ti kabagianna a maysa a Cesar De Guzman sadiay Sitio Tampuco, Matatalahib, Tarlac City.

Sakbay ti panaglibasna iti pagbaludan idi rabii ti Enero 2, nakasaklang ni Hermosura iti panagsalungasing iti Section 5, Article II ti RA 9165 ket naka-docket daytoy iti babaen ti NPS No. I-03-INQ-15L-00310.

Kanaig daytoy, napatulodan amin a polis a nagguardia iti dayta a rabii iti nanotarioan nga apidabit tapno maammuan ti responsible iti pannakalibas ni Hermosura ket mapilaan iti maikanatad a kaso.

Sakbayna, idi Enero 3, nakaawat ti police station iti impormasion a nagpakni ni Hermosura sadiay Tagudin ngem negatibo ti resulta ti operasion nga inwayat ti kapolisan.

Kas maibatay iti inisial a report manipud iti Sta. Lucia police, nagpermiso ni Hermosura a mangaramat iti comfort room iti ruar ti presinto agsipud ta out of order ti latrine iti uneg ti pagbaludan.

Ineskortan ni SPO4 Renato Mangaya, Jr. ni Hermosura iti ruar, sana met laeng insubli iti selda. Ngem mapapati a saan nga ag-lock ti padlock isu a pinusasan ti polis ti makannawan nga ima ti balud sana imposas iti ridaw bayat a matarimaan ti padlock.

Idi agarup 5:00 ti malem, ineskortan ni PO3 Archie Amor Barbosa ti balud a napan iti kusina tapno mangrabii ket imbatina kada SPO2 Richard Alvester ken PO1 Albert Benitez.

Kalpasan ti panangrabii ni Hermosura, insubli ni Alvester ti balud iti selda ket imposasna ti makannawan nga ima daytoy iti ridaw ngem kalpasan ti dua nga oras, mapapati a naikkat ni Hermosura ti posasna sa naglibas.

Saan a nailanad iti report no sadino ti yan dagiti polis ta nakalibas ti balud a dida nasiputan.

Nangiwayat dagiti polis iti manhunt operation ken nangipatulodda iti flash alarm kadagiti nadumaduma a police stations para iti pannakatiliw ni Hermosura ngem negatibo ti resultana agingga iti nakaawatda iti impormasion a nagpaing daytoy iti balay ti maysa a kabagianna sadiay Sitio Tampuco, Matatalahib, Tarlac City.