Footer

Naglibas a balud, sabali pay kaduada, natiliw kalpasan nabukingda a nagtakaw

CANDON CITY – Tallo nga aldaw kalpasan ti panaglibasda iti pagbaludan sadiay Baguio City, natiliw ti dua a balud ken maysa a kaduada kalpasan a nabukingda a nangbiktima iti maysa a negosiante ken ti kaduana a nagtsek-in iti maysa a lodge sadiay Barangay Oaig Daya, Candon City idi parbangon ti Disiembre 16.

Inaresto dagiti polis da Benjamin Gazmin Tulepa, 25, awanan asawa, ken ni Benjie Gazmin Tulepa, 18, awanan asawa, agpada a residente iti Lower Brokeside, Baguio City, ken Raymond Palabay Florendo, 18, awanan asawa, ken residente iti Mamat-ing Norte, Naguilian, La Union.

Natiliw ti ub-ubing a Tulepa ken ni Palabay kalpasan a nabukingda  a nagtakaw iti  San Art Lodge, partikular iti kuarto  a nagtsek-inan da Asnor Langco y Ambilao, 24, awanan asawa, negosiante, ken  residente iti Brgy. San Antonio ken John Rey Galut, 19, residente iti Brgy. Calaoa-an  iti met laeng Candon City.

Mapapati a nakariing ni Langco bayat ti kaadda iti tao a nakaaruat iti asul a t-shirt a nabigbigna idi agangay a ni Palabay.

Nakurimes iti kuarto dagiti biktima ti maysa a brown pouch, dua a selpon, ken P6,300.00.

Naduktalan dagiti polis nga adda standing warrant of arrest maikontra kadagiti agkabsat a Benjie ken Benjamin nga inyisio ni Judge Ivan  Kim B. Morales ti Regional Trial Court, Branch 59, Baguio City gapu iti kasoda a robbery. Nakadetene dagiti dua iti pagbaludan ti Station 6, Baguio City Police Office ngem naglibasda idi Disiembre 13.

Napakaammuan ti Station 6, BCPO sa naipaima kadakuada dagiti agkabsat a Tulepa. (Tawid News)