Naglibas a lider ti gun for hire birbiroken dagiti polis

NARVACAN, Ilocos Sur – Agtultuloy a birbiroken ti kapolisan ti lider ti gun-for-hire groupĀ  iti nadumaduma a lugar a posible a nagpainganna kalpasan a linibasanna dagiti eskortna a guardia sadiay Narvacan idi Hunio 30.

Nagsawar dagiti polis-Narvacan, kaduada dagiti miembro ti CIDG iti sumagmamano a barangay iti NarvacanĀ  a pakairamanan ti Barangay Sococ, Abuor, Dasay, kasta met iti Sta. Maria, a posible a naglemmengan ni Rodrigo Abiang, alias Lodring, lider ti notorious gun-for-hire group nga agop-operate iti Ilocos Sur ken kaparangetna a probinsia ti Abra,Ā  kalpasan a linibasanna dagiti dua a provincial guard a nang-eskort kenkuana para iti pannakabista ti kasona iti Narvacan Regional Trial Court, Branch 22 idi nadakamat a petsa.

Kabayatanna, agtultuloy met ti nainget a panangmonitor dagiti intel operatives kadagiti asideg a kabagian ti naglibas a balud a posible a nagpaknianna.

Inalerto metten dagiti polis dagiti nadumaduma a barangay intelligence network dagiti iti Narvacan tapno monitorenda ti presensia ti asinoman a maisar-ong iti lugarda para iti posible nga operasion ti kapolisan.

Segun iti report, manipud iti provincial jail, ineskortan da provincial guard Efren Marzan, 36, ken ni Juanito Mercurio, 56, ni Abiang tapno dumatag iti korte para iti pannakabista ti kasona iti korte ti Narvacan a sumangsanguanna iti illegal a panagikut iti paltog.

Agsipud ta nasapa pay, mapapati a napan nagsinanglaw dagiti guardia iti maysa a panganan iti asideg ti korte.

Naammuan iti report a saan a nakaposas ni Abiang sakbay a naglibas.

Idi nakauneg dagiti guardia iti pagsinanglawan, kellaat a nagtaray ni Abiang iti laud a direksion nga agpa-Abuor.

Mapapati a nagpaputok dagiti kimmamat a guardia kas warning shot ngem saan nga intaltalek ni Abiang.

Nagresponde dagiti nagtitipon nga elemento ti CIDG, Ilocos Sur, Narvacan police ken Provincial Public Safety Company ket nangisayangkatda iti manhunt operation ngem negatibo ti resultana.

Itay nabiit, inaresto dagiti nagtitipon nga elemento ti CIDG, Narvacan ken Santa police ni Abiang sadiay Santa babaen ti warrant of arrest nga inyisio ni Judge Sixto D. Diompoc ti RTC Branch 72, Narvacan, gapu iti kasona a frustrated murder a nai-docket babaen ti Criminal Case No. 3791-N.#