Footer

Naglibas nga akusado iti rape, naggandat a mangrames manen

TAGUDIN, Ilocos Sur – Natiliwen ti maysa nga akusado iti panagrames sumagmamano nga aldaw kalpasan ti panaglibasna iti Candon City jail.

Tiniliw dagiti polis ditoy ni Rolando Ganacias y Galanote,  32, baro ken residente iti Barangay Tamurong Segundo,  mainaig iti mapapati a pananggandatna a panangrames iti maysa a balasitang nga agbasbasa iti elementaria.

Mapapati a ginandat ni Ganacias a ramesen ni Carla (parbo a nagan), Gr. IV pupil, ngem nakita ti kasinsin ti balasitang ket nagpulong ti polis a sigida a nagresponde ket inarestoda ti suspetsa.

Sumangsango ni Ganacias iti kaso a panagrames iti maysa a baket idi Hulio daytoy a tawen  a naka-docket iti korte kas IS No. CP-07-G-639.

Ngem naglibas ni Ganacias iti pagbaludan itay Sept. 2 babaen ti mapapati a panangsikapna iti guardia.

Segun iti rekord ti Candon police, nagpakada ni Ganacias ken ni SPO1 Jaime Callejo a naka-duty iti dayta a parbangon a mapan umisbo iti comfort room iti ruar ket pinalubosan met ti guardia.

Nagbalaw laengen ti polis idi saan metten nga agsubli ti balud.

Sinawar dagiti polis ni Ganacias ngem saandan a nasarakan.

Iti pannakaisurat daytoy, madama ti pannakapalutpot ni Ganacias sakbay ti pannakaipaimana kadagiti autoridad ti Candon  City. #