Naglibas ni Kirat!

Sarita ni Salvador A. Espejo

(Umuna a paset)

 

NAINAYAD ti panagpataray ni PO2 Manolo Roxas iti kawatiwatan ti Quezon Avenue. Masungadmin ti tiendaan publiko. Domingo ket tumuyutoy dagiti tao. Adu dagiti sangaili a mapan aggatang iti bagnet wenno longganisa nga iyawidda. Kastoyen kaadu dagiti pumaspasiar iti Vigan City manipud pay idi nangabak a maysa a wonder city iti sangalubongan.

 

Naguni ti transmitter. “Calling all mobile cars… Calling all mobile cars…”

 

Pinidutko ti auditibo idinto a tinaldiapak ti relo iti pungupunguak. Alas dies iti bigat. “Mobile car 17…”

 

“Naglibas ni Maximo Castro, alias Kirat! Pinatayna ti guardia. He is believed to be in the vicinity of Barangay 9. Take no chances. Adda kuarentay singkona.”

 

“Naiwaragawag kadin iti radio tapno maballaagan dagiti umili?” dinamagko.

 

“Wen. Naiflash payen iti TV.”

 

 

Nagsakuntipak. Am-ammok ni Kirat. Napeklan a mannugal, mammartek ken mammapatay. Tallon ti pinatayna. Pagbutbutngan iti Barangay San Pedro.

 

Apay a naglibas ni Kirat? Nadamagna kadin a makikabkabit ni baketna ket panggepna ti agibales?

 

“Mobile car 17… Mobile car 17… do you hear me?” naguni manen ti transmitter.

 

“We hear you loud and clear .”

 

“We have just received a complaint from a certain Mila Arce of 24 Magsaysay Village. Maipagarup a hinold-ap ti natayag, swarthy man armed with a 45. The description fits Kirat!”

 

Tinaldiapak ti relok. Apaglabes ti alas onse.

 

Imbuelta ni P02 Roxas ti lugan. Pimmegges ti panagpatarayna idi makadap-awkami iti kalsada nga agpa-Barangay Tamag. Nagpakanawankami iti Magsaysay Village.

 

Nagmenor ni Fred idinto a minirami ti numero dagiti malabsanmi a pagtaengan. Iti asideg ti maikatlo a nagkurusan ti nagtakderan ti balay a birbirokenmi. Insardeng ni Fred ti patrol car iti sirok ti nalayog nga aruo.

 

“Agbatika ditoy ta pennekek no adda dagiti bumalay,” nakunak.

 

Dimsaagak. Nagmattiderak apagbiit iti abay ti nakarikep a ridaw a landok. Pintado iti nakusnaw a duyaw ti kalkalainganna kadakkel a bungalow. Narnuoyan kadagiti sabong dagiti masetas iti panglawaen a paraangan.

 

Nagtimbreak. Madamdama, nailukat ti ridaw ti balay ket timmangwa ti maysa a babai a pattapattak a ni Mila Arce. Ababa a babai, nalukmeg. Agtawen iti manipud 20-22.

 

Idi makitanak ni Mila Arce, dagus a rimmuar iti balayna sana inlukat ti ruangan ti alad.

 

“Sumrekkayo, sir,” kinunana ket nagpaunan nga immuneg iti salas.

Pinagtugawnak ni Mila Arce. Impalawlawko ti panagkitak iti salas. Kabaruanan dagiti muebles. Iti suli iti abay ti nakurtinaan a tawa, maipalpallailang ti nasam-it a boses ni Barbra Streisand.

 

Inruarko ti kuadernok sako pinaisalaysay ken ni Mila Arce ti napasamak.

 

Kagapgapu ni Mila Arce a nakitienda manipud iti Vigan City Public Market ket aggur-uray iti traysikel iti nagsulian ti Florentino Street ken Jose Singson Street idi kellaat nga inabay ti  nagtagiarmas a lalaki sana indugsol ti paltog iti sikiganna. Gapu iti butengna, inyawat lattan ni Mila Arce ti petakana a naglaon iti tallo ribu a pisos, sedula ken sumagmamano nga IDna. Nagtaray ti lalaki a nagpaabagatan.

 

Nagpaarayat ni Mila Arce ket sinawar dagiti tanod ti hold-aper ngem saandan a nasapulan.

 

“Nailangaam ti hold-aper?”

 

“Natayag ken napugot. Kulot. Adda bigotena. Agtawen siguro iti treinta,” kinuna ni Mila Arce.

 

Nagtungtung-edak. Ni Kirat nga agpayso.

 

“Adda kaduana?”

 

“Panagkitak ket agmaymaysa, sir,” kinuna ni Mila Arce.

 

 

Nagpakadaak kalpasan nga impanamnamak ken ni Mila Arce ti panangsurotmi amin a lead para iti pannakatiliw ti nanghold-ap kenkuana.

 

Awan timtimekmi ken ni PO2 Roxas bayat ti panagsublimi iti siudad. Pagammuan, adda simmipdot iti isipko. Inruarko ti mapa ket inadalko. Iti umuna a flash report, nasaripatpatan ni Kirat iti bisinidad iti Barangay 9. Iti maikadua a report, hinold-ap ti maysa a lalaki a kaarngi ti deskripion ni Kirat ni Mila Arce iti nagsulian ti Florentino Street ken Jose Singson Street.

 

No saan nga agbaliw ti rota ni Kirat, agturong iti lugarda a San Pedro!

 

(Maituloyto)