Nagpabettak iti eksplosibo, addan nagan nga iggem ti polis

VIGAN CITY – Addan dagiti nagan nga iggem ti kapolisan a posible a pakasolbaran iti panagpabettak iti eksplosibo iti sanguanan ti maysa a pasdek ditoy siudad idi Mayo 20.

Kinuna dagiti inbestigador a nupay saan a nalawag ti video a nairekord ti CCTV a naimuntar iti asideg ti nakaaramidan ti panagpabettak, adda dagiti nagan nga inted ti akinkukua iti Foxton building nga umarngi iti body features dagiti natiliw ti kamera a limmabas iti nasao a lugar sakbay ti insidente.

Nakaala ti kapolisan kadagiti kopia ti CCTV footages iti Atlas Electronics Audio and Video Service Clinic ken DNJ Refrigeration Supplies nga agpada a masarakan iti Gen. Luna Street, Barangay 1, ditoy siudad.

Segun ken ni Vigan City Chief of Police Maximo Taclas, addan iti proseso a pannakaipatulod dagiti CCTV footages iti Cyber Crime Group (ACG) a nakabase iti Philippine National Police Headquarters, Camp Crame, Quezon City para iti technical evaluation ken nalawlawag a kopia a pakabigbigan dagiti nasalaw ti kamera.

Kas maibatay iti resulta ti panangamiris ti Ilocos Norte Provincial Crime Laboratory Office, naaramat ti ingridiente nga ammonium nitrate, maysa a napigsa nga eksplosibo, iti panagpabettak.

Segun iti polis, maysa a dati a barangay kagawad ti mapapati a nangipatulod iti text message iti maysa a residente iti Quezon Avenue nga adda mapasamak a panagbomba iti saan nga ispesipiko a petsa manipud iti bulan ti Pebrero agingga iti Marso iti daytoy a tawen.

Babaen iti daytoy nga impormasion, nangisayangkat ti kapolisan ti siudad iti napingpinget a panagmonitor ken information gathering mainaig iti nasao a tao no adda kapabilidad daytoy nga ag-assemble ken agiwayat iti panagbomba ken no ania ti motibona.

Maipalagip a maysa nga eksplosibo ti napabettak iti sango ti Danny Boy Hardware and Industrial Supply a masarakan iti Foxton building iti nagsulian ti Gen. Luna Street ken Quezon Avenue, Barangay 1, Vigan City idi agarup 2:00 ti parbangon ti nadakamat a petsa.

Nupay kunaen ti kapolisan a pangapsuten ti improvised explosive device, gapu iti pigsa ti naparnuay a kanalbuong, nadadael ti roll up door ti Danny Boy Hardware and Industrial Supply idinto a nabtak dagiti sarming a tawa dagiti kaarruba ti pasdek a business establishments a pakairamanan ti Shopper’s Mart ken ABC buildings.

Naireport nga agdagup iti P250,000.00 dagiti nadadael iti Foxton Trading, P100,000.00 iti Shopper’s Mart ken P450.00 iti ABC General Merchandise.

Segun pay iti report manipud iti polis, nadakamat ni Ronald Daniel Tiu y Verzula, 52, ken akinkukua iti pagtagilakuan nga idi Nobiembre 2013, mapapati a nakaawat ni Sally Tiu nga asawana kadagiti threat messages iti selpon manipud iti saan nga am-ammo a tao.

Mapapati nga adda pakainaigan daytoy iti kaso kriminal nga impilana iti korte.

Nupay kasta, nasao ni Mrs. Tiu a nadismisen ti nasao a kaso.
Kinuna met ni Corazon Singson, akinkukua iti Shopper’s Mart, nga idi Pebrero 19 daytoy a tawen, nakaawat kadagiti ballaag a mensahe iti selpon a mapapati a mainaig iti kaso nga impilana iti korte.

Nupay kinuna ti kapolisan nga isolated case ti nasao a panagpabettak, indagadag ni Taclas kadagiti business establishments ti panagbalinda a bihilante ken iti panangireportda amin a suspetsado ti tignayda a tattao, kasta met iti panangmentenerda iti serbisio dagiti pribado a security agencies iti 24-hour duty basis ken iti pananginstolarda kadagiti security devices tapno adda pagguddengan dagiti kriminal nga agiwayat kadagiti dakes.#