Footer

Nagpammarang a padi, nakasuan iti illegal recruitment

SAN FERNANDO CITY – Kinemmeg dagiti polis iti entrapment operation ti maysa a lalaki nga agpampammarang a padi ken kameng ti media nga agrekrekrut iti mapan agtrabaho iti ballasiw-taaw nga awan ti permitna.

Inaresto dagiti polis ni Randy Flores, residente iti Barangay Bato ditoy siudad, mapapati a padi iti Crusaders of the Divine Church of the Philippines ken kameng ti media iti operasion nga insayangkat ti POEA-Manila babaen ti tulong ti Central Investigation Detection Group, Camp Crame ditoy siudad.

Nagreklamo da Mark Andrew Directo, residente iti Barangay Ampukaw, Itogon, Benguet ken innem pay a kakaduana a linoko ida ni Flores a nangikari a mapanda agtrabaho iti ballasiw-taaw kalpasan ti panagbayadda iti sag-P30,000.

Naduktalan dagiti biktima nga awan ti permit ti suspetsa nga agrekrut idi napanda pinennek iti POEA-Manila no pudpudno a rekruter daytoy.

Naipilan ti kaso a  panaglabsing iti R.A. 8042 wenno illegal recruitment maikontra iti suspetsa.#