CANDON CITY – Inaresto dagiti polis ti maysa a lalaki a nagpabigbig a soldado bayat ti panaginomna iti maysa a videoke bar ditoy siudad.

Naipan iti police station ni Leo Viejo y Garcia, taga-Gen. T. de Leon, Valenzuela City ngem agnanaed iti barangay Bagani Tocgo, ditoy siudad gapu iti pananggandatna a kumabil idi pagsaludsodan dagiti nagresponde a polis.

Sakbayna, saan a pinalubosan ni Ronaldo Gacoscos, ti security guard, a sumrek ni Viejo iti Tic Tac 2  gapu ta adda kaduana a menor de edad iti baet a nagpabigbig daytoy a maysa a soldado.

Sakbay a nagturong da Viejo iti Zenimar Videoke Bar, mapapapati nga adda inuksotna nga armas iti siketna sana kinarit ti guardia.

Idi pagsaludsodan dagiti nagresponde a polis ti suspetsa, intudotudona ida ken ginandatna ti dumanog. Nupay kasta, naanawa met laeng ti suspetsa.

Impan dagiti polis ti suspetsa iti police station ket ditoy a naturog.

Maysa a polis ti nagkuna a saan a pudno a soldado ni Viejo.#