Nagpaputok a tricycle driver, mabirbirok

SAN VICENTE, Ilocos Sur – Gapu iti panagpaputokna iti paltog bayat ti maysa nga inuman sadiay Sitio Baldi, Barangay Bantaoay, ditoy nga ili idi bigat ti Hulio 23, birbiroken dagiti polis ti maysa nga agpaspasada iti traysikel.

Iti pannakaisurat daytoy, di pay nasapulan dagiti polis ni Claro RobiƱol y Aguilar, 40, ken residente iti nadakamat a barangay a naglibas kalpasan ti insidente.

Iti panagimbestiga dagiti nagresponde a polis, aggiinom ti suspek ken ni Carlito Ruatos y Vitocruz, 57, ken residente iti nadakamat met laeng a barangay, iti maysa a tienda iti barangayda idi iti awan a rason, inruar ni RobiƱol ti paltogna sa nagpaputok iti namindua iti ere sa naglibas a dagus.

Mapapati a caliber 22 ti paltog ti suspek nga inkuyogna met laeng idi naglibas.#