Nagpaputok a maestro, natiliw

TAGUDIN, Ilocos Sur – Panangipagarup siguro daytoy a maestro ket malalaki iti barangayda isu a nagpaltopaltog idi rabii ti Nobiembre 18.

Iggem pay laeng ni Maestro Joey Gogolin Barnachea, 40, naasawaan, ti  paltogna a cal. 22 pistol Beretta nga addaan iti maysa a magasin ken tallo a bala idi napan beneripika dagiti polis, kaduada ni Barangay Captain Constancio Ulpindo, ti report nga adda nagpaputok iti compound ti pamilia Barnachea.

Inaresto dagiti polis ni Barnachea idi awan maipakitana a permit a maikuyogna iti ruar ti residensiana ti nasao a paltog sada impan iti police station para iti dokumentasion ken umisu a disposision.#