Nagpaputok tiniliw dagiti polis

SAN VICENTE, Ilocos Sur – Inaresto dagiti polis ti maysa a karpintero gapu iti panagpaputokna nga awan ti nangprobokar kenkuana idi malem ti Mayo 20.

Nagturong dagiti polis iti Barangay San Sebastian, ditoy nga ili tapno agimbestiga mainaig iti maysa a tawag iti telepono mainaig iti panagpaputok ti maysa a Ricardo Tulio, 61, naasawaan, karpintero, ken residente iti nasao a lugar idi agarup 5:30 ti malem iti Barangay San Sebastian ditoy nga ili.

Sakbay ti panagpaputokna,  immuna a nagdadael ti suspek a mapapati a nabartek kadagiti alikamen ken appliances iti uneg ti balay.

Nupay kasta, naulimek ken boluntario a simmuko ni Tulio kadagiti polis, kuyogna ti HM gauge 12 shotgun, awanan iti serial number, ken nagkarga iti maysa a bala.

Naidatagen iti provincial prosecutor’s office, Vigan City, ti rekord ti kaso nga alarm and scandal maikontra iti suspek.#