Nagparang iti seawall, imahe ni Jesus?

STA. CATALINA, Ilocos Sur – Agdudupudop dagiti tattao a mapan mangkita iti imahe a mapapati a ni nailansa a Jesus a nagparang iti maysa a seawall sadiay Barangay Paratong ditoy nga ili.

Segun kadagiti napan iti nasao a lugar, napatak a makita iti seawall ti imahe ni Jesus a nailansa.

Uray ni Mayor Carlos Asuncion ket napanna metten kinita ti nasao nga imahe iti Barangay Paratong.

Adda payen dagiti mamati a nagikuyog kadagiti sabsabong nga indatonda iti abay ti imahe.

Mapapati nga adda payen naagasan ti nasao nga imahe.

Naammuan ti Tawid News a mapapati nga immuna a nakita ti imahe ni Jesus babaen ti maysa a di nainaganan a lalaki bayat ti panagdiagingna iti igid ti baybay.#