Nagpasngay nga ina, positibo iti A(H1N1) virus

BAGUIO CITY – Positibo iti influenza A(H1N1) virus ti ina a natay kalpasan ti panagpasngayna iti maysa nga ospital ditoy itay nabiit.

Iti report manipud iti maysa a lokal a radio, naammuan a nagpasngay ti saan a nainaganan nga ina iti maysa nga ospital ditoy siudad ket pimmusay iti kumplikasion dagiti dadduma a sakitna.

Maibilang ti ina a high risk iti A(H1N1) gapu kadagiti dadduma a sakitna.

Kinuna ni Department of Health Regional Director ti Cordillera Myrna Cabotaje nga ad-adalenda pay no A(H1N1) virus ti maysa a nakagapu iti ipapatay ti ina.

Kabayatanna, naammuan nga addan 19 a nagpositibo iti A(H1N1) iti Region I

Iti probinsia ti La Union, innem ti naireport a nagpositibo iti nasao a virus ngem naimbaganen ti dua ken agpapaimbag ti uppat.#