Nagpaso ti lisensiana a paltog, naisuko

CANDON CITY, Ilocos Sur – Insuko ti maysa a mannalon ti di napabaro ti lisensiana a paltogna iti polis ditoy tapno mailisi iti kriminal a liabilidad.

Idi malem ti Septiembre 14, boluntario nga insuko ni Hoover Limon y Ayong, 54, naasawaan, mannalon, ken residente iti Brgy. Cubcubbuot, ditoy siudad, ti paltogna nga Amscor cal, 9mm pistol nga addaan serial number 1190710 ken maysa a magasin ken ni SPO1 Jerry Valdez, natudingan a “pulis sa barangay” iti nadakamat a lugar.

Sakbayna, kas paset ti kampania ti kapolisan nga “Oplan Katok”, binisita ni Valdez ni Limon ket impalawag daytoy ti kaadda ti kriminal a liabilidad dagiti agikut iti saan a napabaro ti lisensiana a paltog.

Insuko ni Limon ti paltogna a nagpaso ti lisensiana idi Abril 21, 2013 ken ni Valdez.#