Nagpaturong iti paltog, tiniliw dagiti barangay officials

STA, LUCIA, Ilocos Sur – Gapu iti panangpaturongna iti paltog iti dua a babbaro, buong ti ulo la ketdi ti sanguen daytoy a lalaki agsipud iti posible a panagkakasona.

Impaima dagiti barangay officials ti Barangay Conconig East ditoy nga ili ni Melvin Asajar y Torres, 48, naasawaan ken kalugaranda iti nadakamat a barangay, iti police station ditoy nga ili agraman ti cal. 38 a paltogna.

Mapapati a nakursonadaan ni Asajar da Edwin Hadloc y Valdez, 32, ken ni Jhony Valdez, 22, agpada a baro, mannalon, ken lumugar met laeng iti Barangay Conconig East ket pinaturonganna ida iti paltog.

Saan a nailanad iti blotter no no kasano a nagsagrap iti sugat iti ulo ti suspek a puon ti pannakaipaagasna iti ospital.#