Nagpirma iti impeachment , di immawat iti P1-M: COOP-NATCCO rep

STA. CRUZ, Ilocos Sur – Kinuna ni COOP-NATCCO party list representative Jose Ping-ay a saan a pudno ti kinuna ti maysa a congressman nga adda inawat a P1 million dagiti nagpirma iti impeachment ni Supreme Court Chief Justice Renato Corona.

“No adda maitudona a kongresista nga immawat iti P1 milion, itudona, a, ken paneknekanna no sadino ti yanna, ken kaano ti panangiyawatda kenkuana,” kinuna ni Ping-ay.

Kinuna ni Ping-ay a sisasaganada a mangipila iti darum iti ethics committee maikontra ken ni ANAD Party List Representative Pastor Alcober gapu iti daytoy nga imbalikasna agsipud ta dinadaelna ti integridad dagiti padana a kongresista ken imbabana ti panagkita dagiti umili iti institusion ti Lehislatura iti pagilian.

Maika-89 ni Ping-ay a nagpirma iti impeachment complaint idinto a maika-91 ni Cong. Ryan Luis Singson.#