Nagprobokar a nabartek, nasukalan iti marihuana

STA. LUCIA, Ilocos Sur – Dika uminom iti arak no dimo ammo a kontrolen, ballakad a no intaltalek daytoy a sangsangaili, awan koma ti kaso a sanguenna.

Gapu ta nabartek, naglaawlaaw ken nagprobokar  iti Barangay Nangalisan ditoy nga ili ni Jhose Estioco y Javillana, 19, baro, taga-Caniogan, Pasig City ngem agnaed iti Barangay Barangobong, ket inaresto dagiti barangay tanod sada impan iti police station.

Idi addan ti suspek iti nasao nga estasion, rinikisa dagiti polis ken dagiti tanod ni Estioco ket nakasamsamda iti ikutna ti dua a sachet a naglaon iti napagango a bulong ti marihuana.

Naipan dagiti nakumpiska iti suspek iti Candon City Crime Lab idinto nga inwayat dagiti polis ti naing-inget pay a panagpalutpotda iti suspek.#