Nagprobokar nga armado a lalaki, natiliw

BURGOS, Ilocos Sur – Uray rabrabii la ngaruden, nagprobokar daytoy a lalaki iti barangayda. Ti makadakes, armado pay gayam ket gapu iti daytoy, posible a makasuan la ketdi iti panagikutna iti illegal a paltog a mabalin a pakaibaludanna.

Nagresponde dagiti polis idi nakaawatda iti report nga agprobprobokar ti maysa a Saturnino Carta y Billena, 49, residente iti Barangay Balugang, Burgos, sadiay Barangay Luna iti met laeng nasao nga ili.

Idi asitgan dagiti polis ni Carta, nasiputanda nga adda impalladawna ket idi nagsukimatda, maysa gayam a homemade 12 gauge shotgun.

Idi rinikisa dagiti polis ti suspek, nakakumpiskada iti dua a bala ti nasao a paltog ken imuko iti siket daytoy.

Naikustodia ti suspek iti police station para iti dokumentasion ken disposision.#