Footer

Nagsagana dagiti atletatayo ngem nagkamtudda latta

Iti kalkalpas a Southeast Asian Games, kas ninamnama dagiti autoridad ti sports, inagaw ti Thailand ti overall championship manipud iti Pilipinas a nagkampeon idi 2005.  Ngem ti nakas-ang, nagalus-os ti pagilian iti maikanem a puesto kalpasan a nailuges dagiti atletatayo kadagiti pangnamnamaan a pakagun-odanda kadagiti medalia.

Idi 2005 a pannakaangay ti SEA games ditoy Filipinas, nakaubon dagiti atletatayo iti 113 a medalia a balitok, ngem ita a tawen, kimmiddit la unay iti 41 a medalia a balitok ket iti pannakalus-osna iti maikanem a puesto, inatiwna laeng dagiti lima a pagilian a masansan nga agabog iti SEA a pakairamanan ti Myanmar, Laos, Cambodia, Brunei ken Timor Leste.

Naisualit dagiti umaayamtayo uray kadagiti ninamnama dagiti sports officials a pagrimatanda kas iti athletics, wushu, taekwondo, bowling, traditional boat races, boxing, golf ken karate.

Sigurado, apaman a sumangpet dagiti sports officials ditoy pagilian, agpipinnabasolda manen no apay a nanabtuog la unay ti Filipinas.

Kuna ni Diputado Monico Puentebella, chief of mission ti delegasion, a kangrunaan a makagapu iti pannakaibalat dagiti atletatayo ti kaawan ti logistical support manipud iti Kongreso agsipud iti dida panangipasa iti gakat a mangpataud iti kasapulan dagiti atletatayo para iti panagsanayda ken pannakaibaonda a makisalip kadagiti internasional a paay-ayam.

Maysa dayta. Ngem no adda man kangrunaan a mapabasol iti saan a makapnek a gapuanan dagiti atletatayo, dagiti met laeng sports officials. Agasem, ta uray idi addadan iti Thailand, problema pay laeng dagiti atletatayo ti awatenda a sangkabassit a pocket money. Kaarigda piman iti agpalpalama nga agur-uray iti kaasi idinto a pagrebbengan dagiti opisial nga ited dagiti benepisioda agsipud ta nagan ti pagilian ti ibagbagida iti tay-ak ti sports.

Kapaliiwan pay ti nakaro a pinnolitika kadagiti asosasion ti sports nangruna no maipapan dagiti mangipangulo ken dagiti pondo. Gapu ta nakatuon ti imatangda iti panangsalaknibda iti puestoda ken bukodda a pagimbagan, maipaspasuli ti panagsanay dagiti atleta. Kasano nga umasenso dagiti atleta iti nakisang nga allowances a mait-ited kadakuada, ti kakurang ti exposureda kadagiti internasional a paay-ayam gapu iti problemada iti pondo, ken dagiti kadaanan a pasilidad a pagsanayanda?

Kapaliiwan ketdi nga awan ti epektibo a direksion a turongen dagiti sports association, nangruna iti panagbirok kadagiti atleta nga addaan potensial a mangitag-ay iti pagiliantayo. Ti ketdi pudno, kaadduanna nga sports official, saksaklotenda lattan ti dakulapda ket agpampannurayda lattan kadagiti nabayagen nga atleta uray mangrugin nga agsalog ti kabaelanda. Iti sabali a bangir, matartaripato dagiti ubbing, naandur ken dakkel ti potensialda nga atleta kadagiti kabangibangtayo a pagilian.

Kas nakuna ni Presidente ti Philippine Olympic Committee Jose “Peping” Cojuangco, nainget ti panagsagana ti pagilian, ngem naing-inget nga amang ti panagsagana dagiti sabsabali a pagilian.

Iti nalawlawag a pannao, nailuges dagiti atletatayo, nupay adda kadakuada ti tarigagay nga agballigi, agsipud ta saan a naan-anay ti naited kadakuada a suporta, pannarabay ken abasto manipud iti gobierno ken kadagiti managpolitika nga sports officials.#