VIGAN CITY -Nagturpos itay nabiit dagiti cultural
mappers kalpasan ti pannakakumpletoda iti 76-hour requirement ti
cultural mapping seminar nga inesponsoran ti provincial government.

Nairugi ti nasao a panagsanay dagiti agngayangay nga
agbalin a cultural mappers idi Agosto itay napan a tawen ngem
naitantan ti panagturposda gapu iti kaadu dagiti aktibidad ti
gobierno probinsial.

Kinuna ni UST Prof. Eric Zerrudo a nakasaganan dagiti
nagdalan iti panagsanay para iti panagsukisokda kadagiti nadumaduma
nga ili ti Ilocos Sur tapno maidokumento dagiti tangible ken
intangible heritages a masarakan kadagitoy a lugar. Mangnamnama ni
Zerrudo a maipaay ti grupo ti serbisioda para iti pannakabukel ti
pakasaritaan ti Ilocos Sur.

Kabayatanna, pinagyamanan ni Gob. Deogracias Victor “DV”
Savellano dagiti nakipaset itoy a cultural mapping seminar bayat ti
culminating activity idi Enero 23 gapu iti tarigagayda a madukomento
dagiti napateg a tawid iti probinsia.

“Agbalinkayon a paset iti pannakapreserba dagiti
tawtawid a no saan a maikaskaso, mabalin a mapukaw ken saanton a
makita dagiti sumaruno a kaputotan,” kinuna ti gobernador.

Inyawat
dagiti cultural mappers ken ni Savellano dagiti inisial a dokumento a
gapuananda bayat ti field workda kas paset ti seminar.#