Footer

Nagsanud a saksi iti Cobangco murder case, napapatay

CANDON CITY – Ginudas ti dua nga armado a lalaki ti nagsanud a testigo iti Cobangco murder case iti agsapa ti Septiembre 17 iti sanguanan ti sementerio ditoy a siudad.

Saanen a naidanon ti biag ni Elpidio Jimenez y Ibay, 48, residente iti Barangay Bagani Campo ditoy gapu iti grabe a sugatna.

Naglibas dagiti suspetsa a nakalugan iti motorsiklo. Di pay ammo ti kinaasinoda ken no ania ti motiboda a nanggudas ken ni Jimenez.

Kinuna ni Imelda, asawa ti biktima, nga awan met ti ammona a  kinariri ti lakayna a puon ti nangpatayanda kenkuana, malaksid laeng idi nagsanud nga agtestigo iti pannakapapatay ni Konsehal Jaime Cobangco a mapapati a pannakaawat ni lakayna iti pangta ti biagna.

Segun ken ni COP Marlo Castillo, kitkitaenda  no adda pannakainaig ti pammapatay iti Cobangco murder case agsipud ta nagbalin ni Jimenez a testigo ngem nagbabawi ken puon ti pannakaipakat ti contempt of court kenkuana.

Napapatay ni Cobangco iti galiera ti Calaoaan ditoy ket maysa a kabarangayanna ti kangrunaan a suspetsa iti pammapatay.

Segun iti inisial nga inbestigasion, iti agarup alas siete ti bigat ti Septiemre 17, linuganan ti biktima ti XRM a motorsiklona tapno mapan gumatang iti downtown iti tali para iti bakana.

Ngem idi addan iti sanguanan ti sementerio a sakup pay laeng ti Barangay Bagani Campo, linipit dagiti suspetsa a nakalugan met iti motorsiklo ket idi natuang ti biktima, pinaltogan dagitoy.

Tallo a kapsula ken maysa a deformed slug manipud iti Cal. 45 ti narekobre dagiti inbestigador iti nakapasamakan ti krimen.

Madama ti panagimbestiga dagiti polis mainaig iti nasao a pammapatay.#