Nagsasaruno a panagtakaw iti Sta. Lucia, aramid ti dakkel a grupo?

STA. LUCIA, Ilocos Sur – Mangiwaywayat ti kapolisan ditoy iti naun-uneg nga inbestigasion no gapuanan ti maysa a dakkel a grupo dagiti mannanakaw wenno lumugar laeng dagiti nagsasaruno a panagtakaw iti sumagmamano a barangay ditoy nga ili itay nabiit.

Segun ken ni Police Senior Inspector Antonio Malicdan,  hepe ti polis ditoy,  adda pagpapadaan ti wagas a pannakaserrek dagiti pagtaengan ket daytoy ti kitkitaenda iti panagimbestigada.

Maysa a pagpapadaan dagiti panagtakaw ti pannakaisayangkatda iti parbangon ken ti saan a pulos a pannakapuot dagiti bumalay bayat ti kaadda dagiti mannanakaw iti uneg ti balayda.

Iti las-ud ti maysa a lawas, natakawan ti balay ti maysa a Florante Ramos y Saldevar iti Barangay Catayagan idi parbangon ti Hunio 25, ti balay ni Barangay Captain Salvador Herania Jr.  ken Gemma Fabro y Herania iti Barangay Pila West, ken ti balay ni Barangay Captain Ricardo Habab y Tabios iti Barangay Banbanaba idi parbangon ti Hunio 28.

Natakaw iti balay ni Ramos, 61, ti cash money a P5,000.00, pito a selpon, 2 a kamera, Apple ipad, MP3, HP laptop, Acer laptop ken Swatch watch nga agbalor amin iti sumurok kumurang P163,000.00.

Nakastrek dagiti mannanakaw babaen ti panangikkatda iti lima a jalousie ken steel grills ti bintana iti asideg ti likudan ti balay.

Mapapati a naisayangkat ti panagtakaw iti nagbaetan ti alas 12:00 ti tengnga ti rabii ken 1:00 ti parbangon.

Natakuatan ni Ramos ti panagtakaw iti alas 3:00 ti dayta met la a parbangon idi mapan umisbo ket nakitana laengen dagiti personal belongings ti asawana ken dagiti annakda a naiwarawara iti ruar ti back door.

Agpapada a natakawan ti balay da Barangay Captain Herania, Jr., Fabro ken Habab idi parbangon ti Hunio 28.

Natakaw iti balay ni Herania ti dua a selpon ken kuarta a P270.00 a naiparabaw iti lamisaan iti sala idinto a kinurimes dagiti mannanakaw ti P780.00 a linaon ti bag ken wallet ni Fabro a naikabil iti rabaw ti lamisaan iti uneg ti balayna.

Nakastrek dagiti mannanakaw iti balay ni Herania ken ni Fabro babaen ti pananglukatda iti sliding window.

Nakakita dagiti inbestigador kadagiti tugot iti uneg ti balay ni Herania ken iti kataltalonan ken uray iti likud ti balay ni Fabro nga agturong iti daya a direksion.

Iti sabali a bangir, nadiskubre laengen ti asawa ni  Habab a natakawanda idi agarup alas 6:00 ti agsapa ti Hunio 28 idi makitana a naikkat dagiti jalousie ti tawada.

Natakaw iti balay ti barangay captain ti maysa a Sony laptop, 2 a selpon, ken kuarta nga agdagup iti P5,900.00.

Kinuna ni Malicdan a madama ti panagimbestigada tapno maammuan no dakkel a grupo ti akinresponsible kadagitoy a panagtakaw.

Innayonna a doblienda ti panagpatroliada ken nakikoordinarda kadagiti barangay captains para  iti naing-inget a panagronda dagiti tanod iti lugarda.#