Nagtagipaltog a menor de edad, tiniliw dagiti polis

LIDLIDDA, Ilocos Sur – Menor de edad pay laeng daytoy ngem napalangguadden nga agwalangwalang iti kalsada a nagtagiimet iti paltog.

Resulta: tiniliw dagiti polis ni Gerald Gum-ed y Gallardo,  16, estudiante, ken residente iti Barangay Cabaroan, San Emilio, Ilocos Sur idi malem ti Septiembre 9 sada impan iti police station para iti umisu a disposision.

Nagresponde dagiti polis kalpasan a nagpulong iti police station ti maysa nga estudiante a pinaturongan ni Gum-ed iti paltog.

Apaman a nakita dagiti polis ti suspek, tiniliwda sada  kinumpiska ti ikutna a paltog a  maysa a 9MM Armscor nga addaan serial number 1391916 ngem awanan magasin ken bala.

Mapapati nga ipangpangkusaw nga ipaturong ni Gum-ed ti paltogna kadagiti makasabetna bayat ti pannagnana iti Poblacion Sur, Lidlidda.

Saan a nailanad iti report no nangalaan ni Gum-ed iti nasao a paltog.#