Nagtakaw a menor de edad natiliw iti dragnet operation

CERVANTES, Ilocos Sur – Natnag iti ima dagiti polis ti maysa a menor de edad a masuspetsa a nagtakaw iti dua nga opisina ti gobierno ditoy idi Abril 29.

Iti report a naggapu iti municipal police station ditoy, natiliw ni Bernard Damuca y Aguindao, 15, ken residente iti Barangay Rosario, ditoy nga ili, maysa kadagiti suspek iti panagtakaw iti opisina ti Municipal Health ken ti Commission on Elections a masarakan iti municipal building ditoy nga ili babaen ti insayangkat dagiti polis a dragnet operation.

Nabigbig metten dagiti kakadua ti suspek a pakairamanan da Perry “Miko” Dominguez, Francis “Kiko” Gaceta, kalugaran met laeng ni Damuca; ni Redentor Cayat, 15, maysa nga agnagan iti Joemar, ken maysa a John Doe, agpapada a taga-Abatan, Benguet.

Iti inisial nga inbestigasion dagiti polis, dinadael dagiti suspek ti padlock ti ridaw dagiti nasao nga opisina ket kinurimesda ti maysa a set ti computer ken speaker ken P43,200.00.

Iti pannakaisurat daytoy, mabirbiroken dagiti kakadua ti suspek.#