Nagtakaw iti dormitorio, nabigbig babaen ti CCTV

VIGAN CITY – Mapapati a natukkolan iti ima dagiti agtatakaw ditoy siudad kalpasan ti pannakabigbig ti masuspetsa a nagtakaw iti kasera ti maysa a negosiante a masarakan iti Gen. Luna St., Barangay 1 ditoy siudad a nakatakawan  ti sumagmamano a gamit-komunikasion ti biktima idi agarup 10:00 ti bigat ti Abril 16.

Nagpulong ni Aurora Castillo y Domingo, 43,  awanan asawa, a natakaw ti selponna a Samsung Galaxy 5 nga aggatad iti P30,000.00 ken Ipa Mini nga agbalor iti P25,000.00 ken maysa a Lenovo Smart phone nga agpateg iti P10,000.00 iti uneg ti kuartona.

Ngem nabigbig ti suspek babaen ti CCTV a nainstolar iti Atlas Electronic Repair Shop a masarakan iti Gen. Luna Street, Barangay 1.

Kas maibatay iti rekord iti CCTV, idi agarup 6:20 am ti agsapa ti Abril 16, maysa a Rolando Peres y Pespes, Jr., 29, naasawaan, ice vendor ken residente iti Brgy. Guimod, Bantay, Ilocos Sur, ti simrek iti up-upaan ti biktima a kuarto ket  idi rimmuar, addan awitna a bambanag.

Nangisayangkat ti kapolisan ditoy iti hot pursuit operation babaen ti tulong da Barangay Captain Edgar Formoso ket natiliw ti suspek.

Dua nga aldaw sakbayna, sabali pay a pagdagusan sadiay Barangay Tamag, ditroy siudad ti naireport natakawan a nangkurimesan ti mannanakaw iti nga Acer laptop, Samsung tablet ken selpon a Samsung nga agbalor amin iti P70,000.00.

Ngem mapattapatta a naisayangkat ti panagtakaw iti nagbaetan ti Marso 31 agingga iti Abril 14 a pannakaireport ti panagtakaw.

Segun ken ni Melody Gacita y Turqueza, 47, naasawaan, maestra, ken residente iti Poblacion, Dolores, Abra, pimmanawda iti apartment idi Marso 31 ket sala naduktalan ti panagtakaw idi nagsublida idi Abril 14.

Iti panagimbestiga dagiti polis, nakastrek ti suspek iti apartment babaen ti panangikkatna iti sliding window ti comfort room iti likud ti balay, sa napan iti maikadua a kadsaaran a yan ti kuarto ti biktima ken dagiti gamit-komunikasion daytoy.

Iti pannakaisurat daytoy, naipatuloden dagiti inbestigador dagiti latent prints a naalada iti kuarto iti crime laboratory para ti pannakaamirisda.#