Nagtakaw iti laptop, tablet, naapput iti terminal ti bus

VIGAN CITY – Natiliw iti bus terminal ti lalaki a suspek iti panagtakaw iti maysa a boarding house sakbay a makapanaw ditoy siudad idi rabii ti Oktubre 21.

Iti dayta met la a rabii, sinawar dagiti biktima ti suspek a nabigbig idi agangay a Joshua Garcia y Tualla, 18, baro, ken residente iti San Pablo, Sto. Domingo, Ilocos Sur, agingga iti nasapulanda daytoy nga agur-uray iti luganna iti terminal ti Partas Bus ditoy.

Narekobre iti ikut ti suspek dagiti tinakawna manipud kadagiti biktima.

Iti inisial nga inbestigasion dagiti polis, idi agarup 7:30 iti malem iti Oktubre 21, naduktalan dagiti biktima nga agpapada nga agkaskasera iti balay ni Juanito Aquino, 59, retirado a maestro, ken residente iti Quirino Boulevard, Barangay 9, Vigan City a natakaw ti laptop, tablet, selpon ken dadduma pay a ramit-komunikasionda.

Natakaw ti Acer laptop ni Jim Benedict Buquin y Manuel, 23, room attendant iti Hotel Felicidad ken residente iti Burgos, Ilocos Sur nga agbalor iti P30.000.00; CloudFone Tab nga agbalor iti P5,000.00 a kukua ni Rayven Tabuelog y Barbieto, 17, HRM student iti University of Northern Philippines, ken residente iti Linasin, Bangued Abra; Acer Netbook nga agpateg iti P12,000.00 a kukua ni Janessa Nadia Agsao y Domingo,16, BS LEA student iti UNP ken residente iti Vintar Ilocos Norte; My Phone A888 nga agbalor iti P6,000.00 ken Coby Tablet nga agpateg iti P8,000.00 a kukua ni Jerry Ventura Jr. y Madriaga, 25, sales associate iti Front Row ken residente iti Tubao, La Union, kasta met dagiti nadumaduma nga IDna, driver’s license ken ATM (BPI).

Nagsuspetsa dagiti natakawan ken ni Garcia a kakaseraanda idi naduktalanda nga awan daytoy isu a sinapulda agingga iti nasarakanda iti terminal ti Partas Bus.

Naikustodia ni Garcia iti Vigan City police station idinto a maisagsagana ti tumutop a kaso maikontra kenkuana.#