Nagtakaw iti motorsiklo, nakasuan

STA. MARIA, Ilocos Sur – Napilaan iti kaso iti provincial prosecutor’s office ti dua a lalaki a natiliw a nagtakaw iti motorsiklo.

Nakasuan iti carnapping da Ismael Ragadi Tabaco, 29, baro, ken residente iti Barangay IV, Vigan City ken Barangay Lagatit, Sto. Domingo, ken Victor Petate Anicas, 20, baro, ken residente iti Barangay Cabalanggan, Bantay, gapu iti panangitarayda iti XRM a motorsiklo ni Jeffrey Abero, 28, naasawaan, ken residente iti Barangay Maynganay, Sta. Maria idi bigat ti Abril 23.

Nakaparking ti nasao a motorsiklo iti asideg ti puesto ni Abero iti nadakamat a barangay idi natakaw.

Inaresto dagiti polis ti dua idi sublienda ti Honda Wave a motorsikloda nga imparkingda iti asideg ti puesto ti biktima kalpasan nga impaknida ti intarayda nga XRM a motorsiklo iti maysa a gasolinaan iti Barangay Bulag, Bantay.

Malaksid iti lugan ni Abero, nakarekobre pay dagiti polis iti sabali a lugan a mapapati a tinakaw met la dagiti dua.#