Nagubor iti bus, naipiskot

BANTAY, Ilocos Sur – Nagpullo ti dua a baro a nangubor iti maysa a bus gapu ta kinamat ida ti drayber ken konduktor agingga iti naipiskotda.

Naipan iti police station ditoy para iti umisu a disposision dagiti dua a suspek a da Alvin Pescador y Pilot, 20, ken Joel Pablo y Pilot, 20, agpada a baro ken residente iti Barangay Sagpat ditoy nga ili.

Segun iti inisial nga inbestigasion dagiti polis, idi agarup 11:40 ti rabii ti Enero 14, agdaldaliasat iti Barangay Guimod nga agpaamianan ti Partas bus a minaneho ni Edilberto Pagtiilan, Jr. y Reyes, 34, naasawaan, ken residente iti 48 Honeymoon Road, Baguio, idi kellaat a binato ni Pablo, back rider ti Euro motorcycle a minaneho ni Pescador, ti bus a nakapuntaan ti windshield ken makannigid a paset ti sarming daytoy.

Dagus nga insikko ti drayber ti bus sada kinamat, kaduana ti konduktor ken sumagmamano a pasahero, dagiti suspek agingga a naipiskotda iti sanguanan ti JTC Mall iti Barangay Balaleng.

Agtultuloy ti inbestigasion no dagitoy dagiti nagub-ubor kadagiti bus iti kallabes.#