Nagubor nabartek a pasahero, positibo iti droga

STA. LUCIA, Ilocos Sur – Dimmagsen ti kaso a sanguen daytoy nagubor iti bus kalpasan a napasingkedan a positibo iti droga iti naipakat kenkuana nga eksaminasion.

Saan laengen nga alarm and scandal ken malicious mischief no di pay panagsalungasing iti RA 9165 ti sanguen a kaso ni Lester Aunor Polonio, 27, baro, ken residente iti Barangay Ayusan, Sta. Lucia, Ilocos Sur kalpasan a rimmuar a malaksid a nabartek, positibo iti drug test examination a naipakat kenkuana sadiay crime laboratory ti Police Regional Office 1, San Fernando City, La Union.

Iti pannakaisurat daytoy, adda ni Aunor iti kustodia ti Sta. Lucia police station.

Nagpulong da Melchor Pasion y Raboc, 47, naasawaan, drayber ti Sta. Lucia Bus, ken residente iti Barangay Sabuanan, Sta. Lucia, ken ni Melo Verena, konduktor ti nasao a lugan, a binato ti maysa kadagiti dimsaag a pasaheroda ti luganda iti Barangay Ayusan, ti met laeng nasao nga ili idi agarup alas onse ti rabii ti nadakamat a petsa.

Nagresponde dagiti polis ket inarestoda da Aunor ken ni Bhabeza Umaza, 24, live-in partner ti suspek.

Iti panagimbestiga dagiti polis, limmugan da Aunor ken Umaza ken dua pay a kaduada iti Candon City a mapapati nga addada iti inpluensia ti arak ket nagbalinda a naarimbangaw iti uneg ti bus.

Mapapati a kurang pay iti P50.00 ti pagplete da Aunor.

Mapapati a bimmaba da Aunor a nagibasbassawang kadagiti dakes a balikas ket idi addadan iti laud a paset ti kalsada, inuborda ti bus a nakatiruan ti likudanna.

Naipan dagiti suspek iti Sta. Lucia District Hospital ket positibo a nakainomda iti arak.

Naipan ni Aunor iti crime laboratory ti PRO1 sadiay San Fernando City a nakapakatanna iti drug test ket nagpositibo iti droga.#