NARVACAN, Ilocos Sur – Maysa a passenger type jeep a nagkarga iti burias ti natengngel iti checkpoint dagiti polis iti Barangay Quinarayan ditoy nga ili.
Tinengngel ti napagkaysa a puersa ti 104th Provincial Police Mobile Group ken PNP ditoy nga indauluan ni Police Chief Inspector Marlo Castillo ti pampasahero a dyip nga addaan plaka PEB-531 a minaneho ni Manolo Pagsulingan, residente iti Malacañang, San Carlos City, Pangasinan kalpasan a naduktalanda a nagkarga iti 31 a burias.
Awan ti maipakita ti drayber ti lugan a clearance iti pannakaibiahe dagiti burias manipud iti Bureau of Animal Industry ken National Meat Inspection Commission, agraman dagiti dadduma pay a kasapulan a dokumento iti pannakaibiaheda.
Naammuan a kukua ti maysa a Romeo de Vera, residente iti San Carlos City Pangasinan, dagiti nasao a burias ket mapapati a mailako ditoy nga ili.
Sakbayna, nagpulong ni Helen Aquino, presidente ti Piglets Shippers Association of Ilocos Sur ti kaadda dagiti maibibiahe a burias manipud iti sabali a probinsia a mailaklako iti daytoy nga ili.
Di pay ammo no kasano a nakalusot ti nasao a lugan a nagkarga iti burias iti checkpoint iti Barangay Bio, Tagudin, Ilocos Sur.
Naipasdek ti checkpoint iti Barangay Bio kas paset ti pannakainget ti iseserrek dagiti baboy a posible nga addaan sakit manipud iti sabali a probinsia.
Nagreklamo dagiti gunglo dagiti agtartaraken iti baboy gapu iti maibibiahe a baboy a mailaklako iti probinsia iti nalaka a presio a nangapekto iti negosioda.#
