Naidiskarga a construction materials, nakurangan; 4 delivery men naaresto

STO. DOMINGO, Ilocos Sur – Uppat a lalaki ti nasaklangan iti kaso gapu ta kinuranganda ti indeliberda a construction materials iti maysa a negosiante ditoy nga ili idi Nobiembre 19.

Naiyendorso ti kaso a swindling/estafa, qualified theft iti provincial prosecutor’s office maikontra kada Jose Cornel y Aporong, 39, naasawaan, residente iti Bungro, San Fernando, City, La Union; Mark Anthony Ladi y Munar, 29; Marvin Perez y Ladi, 24, agpada a residente iti San Agustin, San Fernando City, La Union; ken Romnick Ducusin y Ducusin, 26, baro ken residente iti Pao Sur, San Fernando City, La Union.

Nagramut ti kaso iti panangkissay dagiti suspek iti bilang dagiti construction supplies nga indeliberda ken ni Rey Kristopher Jurado y Reyes, 27, naasawaan, akinkukua iti R-Kie J Marketing a masarakan iti Barangay Vacunero, Sto. Domingo, Ilocos Sur.

Iti panagimbestiga dagiti nagresponde a polis, naduktalan a 539 laeng a pedaso ti Superlume Max ti indeliber dagiti suspek idinto a 655 pedaso ti inyorder ni Jurado iti New La Union Plywood Trading Center Inc.

Mapattapatta nga agbalor iti P23,466.00 dagiti saan a naidiskarga a 116 pedaso a Superlume iti nadumaduma a rukod.

Kinuna ni Julius Cesar Tadios y Diso, helper ti R-Kie J Marketing, a sakbay a pimmanaw dagiti suspek, pinapetpetan ti drayber iti P2,000.00 tapno dina ibagbaga a kurang dagiti naideliber.

Ngem impulong ni Tadios ken ni Jurado ti inaramid dagiti suspek. Dagus met a timmawag ni Jurado iti polis ket nagresponde a dagus dagitoy a nagtungpal iti pannakapasardeng iti panagbiahe ti truck dagiti suspek.

Narekobre dagiti di naibaba a kargamento iti uneg ti truck ket naipan dagitoy ken dagiti suspek iti police station para iti dokumentasion ken disposision. (Tawid News Team)