Naikras a motorista, dead on the spot

SANTA, Ilocos Sur – Natay a dagus ti maysa a motorista gapu iti aksidente ti lugan a napasamak sadiay Barangay Sacuyya Sur ditoy nga ili idi malem ti Septiembre 16.

Dead on the spot ni Michael Vincent Ramos y Venenciano, 22, baro, ken residente iti Barangay Barbar, San Juan, Ilocos Sur gapu iti panangatal kenkuana ti maysa a dump truck idi naikras ti motorsiklona kalpasan a nasapgidna ti sabali a lugan.

Rimmuar iti inbestigasion dagiti polis nga agpaabagatan ti motorsiklo a minaneho ni Ramos ket obertekanna koma ti Mitsubishi Adventure SUV a minaneho ni Jonald Cloud y Calpito, 31, ken residente iti Barangay Poblacion East, Nagbukel, Ilocos Sur ngem nagpreno nga agsubli iti liniana ta makasabatna ti Volvo Articulated Dump truck a minaneho ni Rolando Viernes y Menor, 39, naasawaan, ken residente iti San Francisco, Luna, Apayao.

Mapapati nga aksidente a nasapgid ti motorsiklo ti kutit ti SUV a nakaigapuan ti pannakapukaw ti kontrol ni Ramos iti luganna ket naikras ken napilidan ti dump truck a nagsagrapanna kadagiti dunor iti nadumaduma a paset ti bagina ken nakatayanna a dagus.

Nakakustodia ti drayber ti truck iti police station ditoy.#