MAGSINGAL, ILOCOS SUR –Â Nagmalas daytoy a lalaki, naikras la ngaruden, dinungpar pay laeng ti truck a puon ti nakatayanna.
Segun ti imbestigasion ti polisia, sakbay ti pannakadungpar ni Warlito Ustil y Urayanza, edad 50, addaan asawa ken agnaed iti Brgy. Miramar iti daytoy nga ili, naikras ti motorsiklona a Honda Wave 100 iti national highway a sakup ti Brgy. Napo idi agarup 9:20 iti rabii ti Agosto 20.
Mapapati a bayat a nakatugaw ni Ustil iti akindaya a linia iti highway nga umaw-awag iti selponna idi aksidente a dinungpar ti agpaamianan nga Isuzu cargo truck a minaneho ni Mario Rabanal y Espiritu, edad 45, addaan asawa ken taga-Barangay Pila, Cabugao, Ilocos Sur.
Naisagud ti biktima iti sirok ti trak ket naiparangguyod daytoy iti nasurok sangagasut a metro a nakadunoran ti ulona ken dadduma a paset ti bagina a puon ti dagus nga ipapatayna.
Simmuko ti drayber kadagiti immarayat a polis ket adda ita iti police station agraman ti motorsiklo ken selpon ti biktima.#