Footer

NAIMUT AYA NI APONG ILLO? (Maudi a paset)

Tallo laeng ti annak da Lilong Illo a pasig a propesional: da Anti Elizabeth, Angkel Abraham ken Anti Mildred. Addan sadiay California da Anti Elizabeth ken Angkel Abraham. Maestra met iti elementaria iti kabangibang barangay ni Anti Mildred. Addan asawa da Anti Elizabeth ken Angkel Abraham idinto a  balasang pay laeng ni Anti Mildred a kabbalay da Lilong Illo.

Magustuanmi ti agdengngeg kadagiti istoria ni Lilang Ingga. Makaparay-aw-makalinglingay,  nakabutbuteng-makapakintayeg,  makapikapik wenno makapasangit dagiti istoriana ngem pakapidutan iti adal iti biag ta nagameranda kadagiti nadumaduma a maregmeg ti balitok. Maysa pay a magustuanmi unay ti pinale ti amin, ti libre a maidiaya a merienda a bunga dagiti mulada a kaimito, papaya, guayabano, mangga, tsiko, atis ken dadduma pay a prutas.

Ngem di latta maikkat iti panunotko no apay a pinanagananda iti imut ni Lilong Illo.

Naglabas dagiti tawen. Agingga a timmadog datao iti kinaagtutubo. Dimteng ti panawen a pannakaamirisko no apay nga inawagan dagiti dadduma a kaarruba, kakabagian ken am-ammo nga imut ni Apong Illo.

No ngamin adda maisar-ong iti laong da Lilong Illo, ket dumawatda iti bunga dagiti mulada  wenno dagiti agkalkalatkat a mangited iti taraon, imbes a prutas ti ited ni Lilong Illo, ikkanna ketdi dagiti dumawat kadagiti patubo wenno paramut wenno bukbukel. Alaen man wenno saan dagiti kalugaranna dagiti maidiaya a sukat dagiti dawatenda a prutas, saanen nga isu iti napateg kaniak ta nakadakdakkel ti tulnek ken barikawwet (question mark) iti lulonak kabayatan a kudkudkodek ti saan met a nagatel nga alipusposko.

Ayna, apayen? Dayta ti saludsod a namunganay iti panunotko. Diak a masungbatan ti bukodko a bagi. Saanko a magaw-at ti kinangato ti kaipapanan ti natakuatak. Saanko a maibuksilan no ania nga agpayso ti makagapu a naawagan ni Lilong Illo iti imut. No mano nga aldaw, lawas ken bulan a sinukisokko dagiti panid ti darikmat, ngem napaayak a mangammo iti kalkalikagumak.

Iti maysa a bigbigat a naraniag ni Apo Init ngem nalamiis ti puyupoy nga isalsala dagiti muyong, dagiti bulbulong ken dagiti kawayan ken bayog; ken naragsak nga agkakanta dagiti perperroka ken pandanggera iti kakaykaywan, inturturedkon ti nagsaludsod ken ni Lilong Illo.

“Apay a bukbukel, paramut wenno patubo ti it-itedmo kadagiti agdawat iti prutas, Lilong? Nangegko la ket ngarud a kunada nga imutka…”

“Iddo, apok, (ti palayawko idi ubingak),” agkatkatawa ni Lilong Illo a nangkusokuso iti whiteside wall a pukisko, “no ikkam dagiti agdadawat iti prutas, tinaraonam laeng ida kadayta nga aldaw; ngem no inikkam iti patubo, paramut wenno bukbukel, iti masakbayan, tinaraonam ida agingga’t tungpal biagda ken posible pay kadagiti annakdanto.”

Diak nakatimek; kasla sumikbab a buwaya ti ngangak idi naamirisko ti naun-uneg a kaipapanan ti palawag ni Lilong Illo.

Adda kinapudno ti impalawag ni Lilong Illo. No prutas nga agpayso ti itedna, no nakannan, ket imbellengna ti nagbuklanna, nagpatingga ditan. Ngem no pakalatkat, paramut ken bukbukel ti itedna, adda imula ken taraknen dagiti dumawat agingga iti rumangpaya dagitoy ken agbunga a pagtaudan ti  taraonda a sangapamilia iti masakbayan.

“Arakupenka man, apok…” kinuna ni Apong Illo nga agkatkatawa. Nagtulokak lattan, anian nga irut ti innarakupmi!

Ita, saludsodek man kadakayo, naimut kadi nga agpayso daydi Dios-aluadna a Lilong Illo?#