NAIMUT AYA NI APONG ILLO? (Umuna a paset)

Idi ubingkami, naynay a mangmangngegko nga imut kano daydi Apong Illo. Imut a naminpitla, dayta man ti sangkakuna ken ipetpetteng dagiti dadduma a kaarruba, kakabagian ken am-ammo. Timmmangken kano a kasla ittip a kilabban ti kinaimutna. No ania ti makagapu nga ibagada dayta a banag, dayta ti diak a maawatan wenno diak mabatok ti kaadalemna no pudno wenno saan ti sasawenda. Ngamin adda met dagiti mangipetpetteng ken mangibaga nga awan ti kinapudnona dayta a banag. A parparbo wenno parnuay laeng dagiti makagura kenkuana.

Ania aya ti pudno? Salbag, makaulaw a panunoten! Lalo ket kagangganusanna pay laeng ti pannakaawatko ifi  kadagiti banag maipapan iti kinapudno; saanko pay laeng a magaw-at dagiti umisu a pannakailawlawag dagiti pagbatbatayan a pasamak. Saan ketdi a makasikor no di ket mangited laeng iti naun-uneg pay a panangammo kadagiti “apay” a kaimudingan dagiti rasones tunggal agsumbangir a partido – dagiti mangibagbaga ken mangirakrakurak nga imut a namitpitla ni Apong Illo ken dagiti saan a mangayon kadaytoy nga akusasion.

Linilibeg met daytoy tinnudo ken blah-blah-blah ti agsumbangir a partido ti panunotko iti panaglabas ti panawen. Salbag ketdi, diak pay mapuotanen nga agaruy-oy ti butegko nga agpampanunot no dadduma kadaytoy a banag.

Isu a nagpaliiwak man. Nagimutektekak. Ingkagumaak ti immasibay ken ni Lilong Illo tunggal adda panawenko. Ta sumagmamano laeng met a bloke ti kaadayo ti inaladan ti balayda ken Lilang Ingga nga asawana.

Diak pay nakita a nagmisuot ti baket wenno pormal koma ti panagruprupana. Kanayon a naisem ken makaay-ayo a kasarsarita lalo no agistoria iti maipapan kada apo bulan ken apo init; dagiti agrimatrimat a bituen ken ti tao a tumangtangad kadakuada; da sunggo ken ni pag-ong; ti puraw a karabasa; no apay nga adda ipus ti sunggo; no apay a naalsem ti naganus a mangga, ken dadduma pay. Ay, naglaing nga agistoria daydi Lilang Ingga!

Idi agangay ket naawis met a simmurot dagiti kabaddungalak nga ubbing. Naynayen ti ipapanda iti laong da Apong Illo tapno agdengngeg iti estoria ni Lilang Ingga. Ngem siak, malaksid kadagiti makaay-ayo a sarsarita ni Lilang Ingga, kayatko a takuaten ken paliiwen ti makagapu iti akusasion dagiti dadduma nga imut a ni Lilong Illo.

Iti sikigan ti dos grado a balayda da Lilong Illo, nalawa dagiti minulaanda ken pagat-apitan kadagiti nadumaduma nga agbungbunga a kaykayo, a kas iti bayyabas, tsiko, makopa, nasam-it a santol, lomboy, bugnay, kaimito (a pasaray kainito iti termino ni Lilang Ingga, nga umanay a pagiillekanmi) nagduduma a klase ti mangga ken dadduma nga agbunga a prutas ken dagiti agkalkalatkat a mangited iti taraon. Mapalpaliiwko a dagitoy ti masansan a burasen ni Lilong Illo nga ilako kadagiti komersiante ken masansan met nga itugaw ni Lilang Ingga iti pagtagilakuan sadiay tiendaan ti ilimi a Narvacan iti Domingo nga aldaw ti tienda ken naruay dagiti aguudong nga agpasiar, makimisa, makitienda iti abastoda iti sumagmamano nga aldaw no di man makalawas, ken kadagiti umaliwaksay met tapno mailiwliwagda ti kettangda nga agmalmalem a mapudpudotan wenno matudtudduan kadagiti bangkagda ken talon.

Ngem nabayag sako natakuatan no apay nga ibagbaga dagiti kaarrubami nga imut ni Apong Illo!

(Adda tuloyna)