Komentario: Naipaigiden ti Senate Investigation iti kontrobersia iti BuCor | Tawid News Magazine - Weekly Ilocos News 📰

Naipaigiden ti Senate Investigation iti kontrobersia iti BuCor

MAISUBLI ngatan ti turongen ti imbestigasion ti Senate Blue Ribbon Committee ken Committee on Justice iti kontrobersia iti Bureau of Correction mainaig iti saan nga umno a pannakaipakat ti Republic Act No. 10592 wenno Good Conduct Time Allowance kadagiti nasentensiaanen a nakabalud sadiay National Penitentiary kalpasan a bimmaawen ti isyu dagiti “ninja cops” nga adda pannakainaigna iti “drug recycling.”

Itan ta naglusulosen ni Gen. Oscar Albayalde kas Chief ti Philippine National Police a nasapsapa ngem iti naituding nga ibabana iti akem, ken idadanon ti compulsory age retirement, sumubli ngatan ti sentro ti imbestigasion nga idauluan ni Senador Richard Gordon. Saan a mailibak a ginaburan ti isyu ti ninja cops ti madama nga isyu nga im-imbestigaren ti Senado manipud idi imbulgar iti executive session ni Baguio City Mayor Benjamin Magalong, retirado a police general ken sigud a Director ti PNP Criminal Investigation and Detection Group, ni Albayalde a mapapati a nangkonsintir kadagiti 13 a polis a pasurotna nga adda pannakainaigna iti “agaw-bato, drug recycling, palit-suspek” idi isuna pay laeng ti Provincial Director sadiay Pampanga idi 2013. Kinanunongan pay dayta dagiti dadduma a retiradon a heneral a nagimbestigar iti kaso dagiti polis a nakasuan iti “grave misconduct,” ngem nadusada laeng babaen ti “one rank demotion” imbes a naikkatda iti serbisio.

Nagbalin a kontrobersial dagiti alegasion kontra ken ni Albayalde ken dagiti mapapati a ninja cops a nanggabur iti nabara nga isyu ti GCTA a bimmaaw kalpasan a naglusulosen kas BuCor Director ni Nicanor Faeldon, ken pannakakastigo dagiti babaenna nga adda pannakainaigna iti pannakawayawaya dagiti Persons Deprived of Liberty babaen ti GCTA uray no saanda a kualipikado.

Naisardeng ti imbestigasion iti “freedom for sale” ken ti kaadda ti katukadna a bayad dagiti amin a benepisio a sagsagrapen dagiti balud ta nagsentron ti imbestigasion ken ni Albayalde agingga a naglusulosen daytoy kas PNP Chief. Ngem uray no kasta, saan koma nga agpatingga iti imbestigasion ti Senado iti sigud a PNP Chief tapno maipakita iti publiko a serioso ti administrasion iti pannakadalus ti PNP kadagiti rinuker a miembro.

Iti pannakaituloy ti imbestigasion iti Senado, makutkot koma ti kaso ti pannakainaig dagiti immun-una a BuCor Director General sakbay ken ni Faeldon manipud idi nairugi ti implementasion ti GCTA idi 2014 ta uray pay idin ket addan dagiti napaspasamak a kurapsion iti ahensia ken iti National Penitentiary wenno National Bilibid Prisons.

Nasken a maimbestigar dagiti immun-una a BuCor Director pakairmananan ni Senador Ronald “Bato” de la Rosa, a nagakem a mangidaulo ti ahensia iti sumagmamano a bulan kalpasan ti panagretirona kas PNP Chief. Naglusulos a BuCor Chief idi nagkandidato a senador. Inaklon ni De la Rosa nga iti nabiit a panagserbina kas BuCor Director General ket adda nasurok a 120 a balud pakairamanan ti maysa a drug lord dagiti nawayawayaan.

Nasurok a 2,000 a PDL dagiti nawayawayaan gapu iti GCTA, ngem adu kadakuada dagiti boluntario a simmuko ken naisublin iti NBP gapu iti pangta ni Presidente Rodrigo Duterte a maideklarada a pugante ken nangiparuar pay ti reward money no matiliwda. Iti kadagupan dagiti simmuko a nawayawayaan babaen ti GCTA, adda mano kadakuada dagiti nakaaramid iti nakaam-ames a krimen wenno dagiti nainaig iti illegal a droga? Simmuko kadin dagiti nawayawayaan a drug lord wenno nakapanawdan iti Pagilian? Ayannan ti drug lord a nawayawayaan idi panawen ni De la Rosa kas BuCor Chief?  

Iti agdama, madama ti panangrepaso ti Supreme Court ti baro nga Implementing Rules and Regulations ti GCTA nga insagana da DILG Secretary Eduardo Año ken Justice Secretary Menardo Guevarra ta adda dagiti nagpetision a PDL a nagkuestion ti implementasionna.

Nagakem metten ti baro a BuCor Director Generald a ni Gerald Bantag, manipud iti Bureau of Jail Management and Penology, ken mapagbutbutngan kadagiti nagserbianna a warden kas sadiay Parañaque Jail ta napapatay dagiti 10 a balud kabayatan ti panagserbina iti dayta.

Nagkari ni Bantag a dalusanna ti New Bilibid Prisons. Immuna nga addangna ket rinelibuanna dagiti 300 a jail officers iti BuCor ket nagkiddaw kadagiti naggapu iti BJMP ken PNP National Capital Police Office a temporario nga agbantay iti NBP. Pinaipawilna ti panageserrek ken panagusar ti cellphone dagiti jail officers iti uneg ti prison compound tapno maliklikan ti pannakailakoda kadagiti balud.

Pinaduprakna pay dagiti “kobol: iti uneg ti Maximum Security Compound tapno awanen ti pagyanan dagiti maibilang a Very Important Prisoners, ken tapno mapasardengen ti operasion ti illegal a droga iti uneg ti pagbaludan. Rumrumuar iti imbestigasion a dagiti nakabalud a drug lord ket isuda met laeng ti adda pannakainaigna kadagiti drug recycling operations iti ruar ti pagbaludan.

Iti pannakaisubli ti imbestigasion ti Senado iti maanomalia a pannakipakat ti GCTA. Saan koma a maipaigid a maimbestigaran, dagiti sigud nga opisial ti BuCor nga adda pannakainaigna iti pannakawayawaya dagiti saan a kualipikado a balud ta agatap dagiti umili iti kaadda ti kurapsion iti ahensia iti naglabas a panawen.

No nababalaw ken naglusulos kas PNP Chief ni Albayalde gapu iti nagbiddutanna iti naglabas idi 2013, kasta koma met koma ti aramiden dagiti agdama nga opisial ti gobierno nga adda pannakainaigna kadagiti saan nga umno nga aramid iti BuCor.

Napalaus ti talek ni Presidente Duterte idi ken ni De la Rosa, isu a dinutokanna a PNP Chief tapno adda katulonganna iti kampania kontra krimen ken illegal a droga. Inyalud-odna pay ti serbisiona iti PNP iti sumagmamano a bulan, kalpasanna, dinutokanna a BuCor Chief. Ngem ania ti nagapuanan ni De la Rosa kas BuCor Chief iti pannakadalus ti ahensia ken pannakaparmek ti illegal a droga?

Itan ta senadoren ni De la Rosa, isu koma ti maysa kadagiti kangrunaan nga agimbestigar iti Senado mainaig iti GCTA ken dagiti ninja cops a mainaig iti illegal a droga, ngem nakaskasdaaw ti kinaulimekna. Adda ngata kalkalubanna ta kanayon met nga awan kadagiti naglabas a bista?