Naipangato bayad construction materials a maikabil iti bangketa ti kalsada

VIGAN CITY – Naipangato ti bayadan dagiti kontraktor, agpatakder iti balay, ken house owners nga agibuntog kadagiti construction materials iti pavement ti kalsada ditoy siudad.

Inamendaran ti Ordinance No. 5, Series of 2014 ti probiso ti Ordinance No. 7, Series of 1989 ket impangatona ti bayadan dagiti contractors, builders, house-owners nga agikabil kadagiti construction materials a mangukopar iti street pavements ditoy siudad.

Kadagiti agikabil iti construction materials iti pavement ti kalsada iti siudad, agbayadton iti P35.00 kada aldaw dagiti agtagikua iti residential bungalow, P70.00 kada aldaw dagiti residential a dua a kadsaaran ken ad-adu pay; ken P175.00 kadagiti komersial ken industrial a pasdek.

Sagudayen pay ti ordinansa a responsibilidad ti akinkukua a dalusan ti nagibuntoganna kadagiti construction materials apaman a malpas ti konstruction ken mangiinstolar kadagiti early warning devices wenno reflectorized signs iti lugar.

Agsungbat iti damages ti akinkukua no adda mapasamak nga aksidente gapu kadagiti inkabilna a construction materials iti street pavements, kuna pay ti ordinansa.#