Naipaputok a kapsula dagiti paltog, maipakatan iti cross matching

CAMP PRES. ELPIDIO QUIRINO, Bulag, Bantay, Ilocos Sur – Imbilin ti provincial director ditoy ti pannakaipakat ti cross matching dagiti naipaputok a kapsula a narekobre dagiti inbestigador iti nabomba ken napuoran a bodega ti maysa a kompania ti tabako iti Barangay Sidaoen idi Mayo 22, 2011.

Imbilin ni OIC Provincial Director Police Senior Supt. Reynante Partible ti pannakaipakat ti cross matching dagiti naipaputok a kapsula ti cal 5.56 ken 7.62 a narekobre iti asideg ti bodega ti Philip Morris and Fortune Tobacco Corporation a nakapuoran dagiti pempen a tabako no naaramat dagitoy kadagiti napalabas nga insidente a nakainbolbaran dagiti armado a tattao.

Sakbay daytoy, nabuangay ti maysa a task force a mangiwayat iti naun-uneg nga inbestigasion mainaig iti pannakabomba ti bodega ken pannakapuor dagiti pempen a tabako a mapattapatta nga agpateg iti P1.2 milion.

Kinuna ni Partible a ti Criminal Investigation and Detection Group (CIDG), ti Scene of the Crime Operatives (SOCO), dagiti inbestigador manipud iti police provincial office ken ti Sta. Cruz police dagiti nangbuangay iti nasao a task force.

Kanaig daytoy, imbilin ni Partible kadagiti hepe ti polis iti Galimuyod, Sta. Lucia ken Cervantes ti panangidatagda iti PNP crime laboratory kadagiti nakolektada nga ebidensia para iti cross matching mainaig kadagiti napasamak nga insidente iti hurisdiksionda a nakainbolbaran dagiti armado a tattao a mapapati a local communist terrorists (LCTs).

Maipalagip nga adda naireport nga insidente ti harassment iti Philippine  Army-CAFGU detachment iti Galimuyod idi Oktubre 9, 2010; engkuentro iti nagbaetan ti Philippine Army ken LCTs idi Septiembre 10, 2010 ken ti pannakaraut ti Sta. Lucia police station idi SePtiembre 2003; ken ti pannakabomba ti Smart Cellular tower iti Cervantes idi 2009.

Idi agsapa ti Mayo 22 daytoy a tawen, winangwangan dagiti rimmaut nga armado a tattao a masuspetsa a kameng ti New People’s Army ti kongkreto nga alad ti bodega babaen ti improvised explosives.

Inarmalait pay dagiti rimmaut ti outpost dagiti guardia iti main gate ti pasdek a nakarekobrean dagiti inbestigador iti 40 a kapsula ti M16 ken 3 kapsula ti M14 rifles iti dayaen a paset ti guard house.

Apaman a nakastrekda iti compound, binukbokan dagiti rimmaut dagiti pempen ti tabako iti gasolina sada sinilmutan. Mapattapatta nga agpateg iti P1.2 milion dagiti napuoran a tabako.

Suspetsa dagiti empleado ditoy nga adda pakainaigan ti pannakapuor ti bodega iti na-awat ti management a surat nga agdawdawat iti kuarta ngem saanna a pinatgan.

Ngem iti pannakaisurat daytoy, awan pay ti waragawag ti NPA nga isuda ti akinresponsibilidad iti mapapati nga insidente ti harassment iti kompania ti tabako.#