Naipasngay a quadruplets, nagsasarunoda a pimmusay

SAN ESTEBAN, Ilocos Sur – Quadruplets ti impasngay daytoy 19-anios nga ina idi Abril 28 ngem daksanggasat ta dida nagbayag a nagbiag agsipud ta kurang ti bulanda a naiyanak.

Segun iti report a naawat ti Tawid News, nagpasngay iti uppat ni Roselyn Lusong, 19, residente iti Barangay Apatot ditoy nga ili ngem nagsasarunoda met laeng a natay agsipud iti kinakurang ti bulanda a naiyanak.

Kinuna ni Juancho Lusong, asawa ni Roselyn a nangrugi a nagpasikal ti asawana idi Abril 28 ket immuna nga inyanakna ti maysa a fetus nga agdakkel laeng iti maysa a dangan.

Gapu iti panagtuloy ti sakit ti tian ni Roselyn, intaray ni Juancho iti Guerrero Clinic and Hospital iti Santa Maria ket dita a nangipasngay pay iti tallo a maladaga.

Kalpasan ti sumagmamano a a kanito, natay ti dua. Intarayda ti maikatlo iti Candon City Hospital ket naikabil iti incubator ngem daksanggasat ta natay met laeng daytoy kalpasan iti sumagmamano nga aldaw.

Naammuan ken ni Dr. Rojelyn Gelera, maysa a pediatrics doctor,  nga innem laeng agingga iti 7 a bulan dagiti maladaga idi naipasngayda.

Iti interbio ti media ken ni Juancho, kinunana a maikadua pay laeng a panagpasngay ti asawana ket lima koman ti anakda no nakalasatda.

Naipumpon a dagus dagiti maladaga iti sementerio ti daytoy nga ili.#