Naireport a natakaw a motorsiklo, natuntonan dagiti polis a naisalda

STA. CATALINA, Ilocos Sur – Napasubli met laeng ti akinkukua iti dua a motorsiklo a naireport a natakaw iti nakaigaraheanda sipud pay idi sakbay ti panaggibus ti Tawen 2013.

Natuntonan dagiti polis dagiti naireport a natakaw a motorsiklo ni Michael Razonable y Ragucos sadiay Barangay Pangada, Sta. Catalina, Ilocos Sur, ken iti Barangay IV, Vigan City, Ilocos Sur.

Idi agarup alas 8:00 ti bigat ti Enero 4, natuntonan dagiti polis ti Honda Wave 125, iti ikut ni Leonardo Ragunjan, Jr. y Capara, 38, mannalon, residente iti Barangay Subec, Sta. Catalina.

Iti dayta met laeng a petsa, iti agarup alas 3:00 ti malem, natuntonanda ti Yamaha Mio Soul iti ikut ni Randy P. Arizabal, 34, ken residente iti Barangay IV, Vigan City.

Ngem kinuna da Ragunjan ken ni Arizabal nga insalda ti anak ni Michael a ni Mark Rudolf Razonable y Ragunton, 17, dagiti motorsiklo kadakuada.

Maipalagip nga idi Enero 3, inreport ni Julita Razonable y Ragucos, 66, balo, a mapukpukaw ti dua a motorsiklo a nairehistro iti nagan ti anakna a ni Michael Razonable y Ragucos.

Segun iti baket, idi pay la Disiembre itay napan a tawen a naikabil iti garahe ti balayda dagiti motorsiklo nga awan ti bantayda.

Naiyawat dagiti dua a motorsiklo ken ni Michael Razonable kalpasan a nag-aaregloda kada Ragunjan ken Arizabal tapno saanen a dumanon pay ti kaso iti korte.#