Naisadsad a bangkay, nabigbigen

CAOAYAN, Ilocos Sur – Nabigbigen ti bangkay ti lalaki a nasarakan a naisadsad iti Sitio Pantay Sola, Pantay Tamurong,  ditoy nga ili idi malem ti Septiembre 17.

Nabigbig ti bangkay babaen dagiti kakabagianna a ni Walter Chinalpan, 38, naasawaan, native ti Sadanga Mt. Province ngem agnaed iti Purok 7, Kias, Baguio City, ken kameng ti 50th IB, 5th ID, PA a nakabase iti Manabo, Abra.

Da Alejandro Quitevis ken maysa a kaduana iti Ilocos Sur Mining and Construction Corporation ti nakasarak iti bangkay ni Chinalpan a naisadsad iti igid ti karayan ti nadakamat a sitio idi agarup ala 1:35 ti malem ti Septiembre 17 nga addaan iti dunor iti ulona ken akinngato a paset ti makannawan a kidayna.

Madama ti inbestigasion no adda foul play wenno nalmes ti biktima.#