Naisadsad a killer whale, nadunor iti bongbong: BFAR officer

STA. MARIA, Ilocos Sur – Dagiti sugatna iti nadumaduma a paset ti bagina a gapuanan ti dinamita ti impatay ti killer whale a naisadsad iti igid ti baybay ti Barangay Nalvo ditoy nga ili idi malem ti Abril 3 , segun iti maysa nga opisial ti Bureau of Fisheries and Aquatic Resources.

Kinuna ni BFAR provincial officer Benny Saraos a suspetsada a nagtaud iti napabettak a dinamita dagiti sugat ti killer whale iti nadumaduma a paset ti bagina a puon ti kimmapsutan daytoy ken nakatayanna.

Innayon ni Saraos nga adu pay dagiti babassit a sugat iti bagi ti killer whale a mapapati a sinikbab dagiti lames iti kabaybayan.

Segun iti report a dimmanon iti polis ditoy nga ili, nasarakan ti maysa a di nainaganan a mangngalap ti nasao a killer whale a tumtumpaw iti igid ti baybay a sakup ti Barangay Nalvo iti agarup alas 3:00 ti parbangon ti Abril 3.

Mapapati nga awanen ti biag ti killer whale a mapattapatta nga agdagsen iti maysa a tonelada ken agatiddog iti 15 a kadapan idi maipaigidda.

Kinuna ni Saraos a dinagdagusda ti nagturong iti Barangay Nalvo apaman a naipakaammo kadakuada iti nasao nga insidente ngem saandan a nakamakam pay a sibibiag daytoy.

Nagtitinnulongan dagiti bumarangay ti nagkali iti abut iti asideg ti baybay ket ditoy nga intanemda ti killer whale.

Daytoy ti kadakkelan a killer whale a naisar-ong iti kabaybayan ti probinsia.

Kabayatanna, umad-adu dagiti turista a dumaydayo iti Pagudpud, Ilocos Norte tapno buyaenda dagiti Humpback whales a naisar-ong iti nasao a lugar sipud pay idi Abril 2.

Kinuna ti maysa a propesor manipud University of Northern Philippines a napintas a pagindegan dagiti endangered marine species  gapu iti kinaiduma ti igid ti kabaybayan ti Ilocos Norte.

Mapapati a nakadanon dagiti Humpback whales iti Pasaleng, Pagudpud, Ilocos Norte gapu iti panagbirokda iti napudot a kadanuman a pagayuyangan ken pagbuggianda.#