Naisadsad a pawikan, naisubli iti baybay

LAOAG CITY – Naisubli met laeng iti baybay ti maysa a pawikan a naisadsad iti igid ti baybay ti Barangay Pagsanjan, Badoc, idi Disiembre 13 ditoy probinsia.

Kinuna ni Arthur Valente, Fishery Regulatory Coordinator ti Provincial Agriculture Office ditoy a maysa a green turtle ti naisadsad iti igid ti baybay ti nasao a barangay.

Impalagip ti nasao nga opisial a maibilang ti green turtle kadagiti endangered species ditoy pagilian ket maiparit ti panagtiliw kadagitoy.

Kasta met a saan a maipalubos ti panagala ken panaglako kadagiti itlog ti pawikan tapno saan a nadaras a maungaw ti puli daytoy.#