Naisadsad a dolphin, natay

SINAIT, Ilocos Sur  –  Naitabon iti Barangay Dadaliquiten ditoy nga ili ti dolphin, uppat nga aldaw kalpasan a naisadsad iti igid ti baybay ti Barangay Virgen Milagrosa, Badoc idi Enero 24.

Mapapati a natay ti agatiddog iti 7.3 metro a dolphin gapu iti kinnanna a sumagmamano a plastik a nasarakan iti bagisna.

Mapapati a sinerraan dagiti plastik ti pagnaan ti kinnan ti dolphin a puon ti kimmapsutanna, segun iti naisayangkat nga autopsia iti bangkayna.

Idi napan a tawen, adda dagiti naireport a dolphin a naisadsad ken pimmusay iti igid ti baybay iti sumagmamano a coastal barangays iti Ilocos Norte.#