Naisalda a motorsiklo, napudasdasan a natakaw

MAGSINGAL, Ilocos Sur – Pimmudno ti suspetsa ti maysa nga empleada iti gobierno a natakaw ti motorsiklo a sinaldaan ti lakayna manipud iti kalugaranda idi Agosto 4.

Babaen ti macro etching examination nga inwayat ti Ilocos Sur Crime Laboratory Office iti nangisit a Yamaha Mio Sporty scooter nga impan ti polis-Magsingal iti nasao nga opisina, naammuan a 40C-l27146 ti numero ti makina ti lugan ngem saan a masierto ti nadadael a chassis number daytoy.

Ngem idi bineripika ti Provincial Highway Patrol Team-Ilocos Sur ti nasao a motorsiklo, napudasdasan a PA040C000D0168964 ti chassis numberna ken karaman iti listaan ti Nationwide Wanted/Stolen Motor Vehicles ken kukua ti maysa a Mary Grace Recolizado a taga-Barangay San Julian, Vigan City.

Naireport a natakaw ti nasao a motorsiklo iti abagatan a paset ti Plaza Burgos, Vigan City idi agarup 6:00 ti malem ti Disiembre 9, 2013.
Nagsuspetsa ni Taasin a natakaw ti motorsiklo idi naduktalanna bayat ti panangpunasna iti motorsiklo a di mabasa ti chassis number ti lugan.

Maysa a Leonardo Ugale, residente met laeng iti Brgy Panay Norte, Magsingal, Ilocos Sur, ti nangisalda iti motorsiklo iti asawa ni Taasin.#