Naisalda a motorsiklo, puon ti nakabagsolan trike driver

VIGAN CITY – Maysa a drayber iti traysikel ti binagsol ti kalugaranna sadiay Del Pilar Extension, Barangay 8 ditoy siudad idi malem ti Oktubre 6.

Naireport a binagsol ni Henrich Ganapin y Nisco, 19, baro, ni Roberto Ragamat y Fernandez, 24, naasawaan, agpaspasada iti traysikel idi agarup 2:45 ti malem ti nadakamat a petsa gapu iti naisalda a motorsiklo.

Mapapati a sinitar ni Ganapi ni Ragamat gapu iti naisalda a motorsiklo ket nagdinnanogda ngem naanawa ida dagiti kalugaranda.

Pimmanaw ti biktima ngem idi agdaldaliasat ti traysikel a minanehona iti nakapasamakan ti pammagsol, mapapati a sinalangad ni Ganapi ni Ragamat ket nagdinnisnogda.

Binagsol ti suspek ti biktima a nakasugatan ti kanawan a lapayag ti biktima.

Naitaray ti biktima iti Gabriela Silang General Hospital, Vigan City idinto a naaresto ti suspek iti balayna.

Saan a narekobre ti patadem nga inaramat ti suspek a pinangbagsol iti biktima.#