Naitaray a lugan ti padi, narekobre dagiti polis

CERVANTES, Ilocos Sur – Narekobre met laeng dagiti polis ditoy ti lugan ti maysa a padi nga intaray ti maysa a  carnapper idiay Barangay Man-atong, Suyo, Ilocos Sur idi bigat ti Nobiembre 8.

Kinuna ni Police Chief Inspector Simon Damolkis, hepe ti polis ditoy nga ili, a narekobreda ti Mitsubishi Delica a lugan ni Fr. Ernesto Juarez, kura paroko ti Cervantes, iti Dinwende East, ditoy met laeng nga ili idi agarup alas dies ti rabii ti nadakamat met laeng a petsa.

Inaresto met dagiti polis ti maysa nga agnagan Berto Paredes, residente iti Sitio Tagpew, kangrunaan a suspek iti pannakaitaray ti lugan ni Juarez bayat a nakaparking daytoy iti Sitio Cayunokon, Barangay Man-atong, Suyo Ilocos Sur idi Nobiembre 7.

Naammuan iti panagimbestiga dagiti polis a pinanawan ni Juarez ti luganna iti nadakamat a lugar ket nagturong iti Batawang ken Tagpew, Cervantes ngem idi agsubli, awanen ti luganna iti nakaiparkinganna.

Segun dagiti saksi a nainaganan Rosenda Sacnit, Fredo Sacnit ken Juan Pascua, agpapada a residente iti Barangan Man-atong, nakitada ti Delica van a minaneho ti dida nabigbig a tao nga agpadaya a direksion nga agturong iti Cervantes iti agarup 9:00 ti bigat.

Dagus a nangipasdek dagiti polis iti panangidaulo ni Damolkis iti dragnet and search operation a nagtungpal iti pannakarekobre ti nasao a lugan ken iti pannakaaresto ti suspek.

Naipaiman ti suspek iti Suyo police station para iti naan-anay a pannakainbestigana.#