Naitaray a motorsiklo, narekobre

VIGAN CITY – Narekobre idi malem ti Abril 19 iti Barangay Salindeg ditoy siudad ti maysa a motorsiklo a naireport a mapukpukaw sadiay Barangay Tamorong, Sta. Catalina, Ilocos Sur idi rabii ti Abril 17.

Nasarakan ti Mio Sporty a nakaparking a di nakatulbek ken addaan iti nadadael a headlight ken flasher agraman ti lisensia, card ken ID ti akinkukua a ni Reynante Regua y Raganan, 32, naasawaan, residente iti Barangay Pantay, Vigan City.

Idi parbangon ti Abril 18, inreport ni Regua iti polis-Sta. Catalina a mapukpukaw ti motorsiklona a pinanawanna a nakaparking ngem saan a nakatulbek iti igid ti baybay ti Barangay Tamorong idi agarup 11:00 ti rabii ti Abril 17.

Mapapati a nakursonadaan nga intaray ti saan a nabigbig a tao ti motorsiklo agsipud ta saan a nakatulbek daytoy.#