Naitawtaw a mangngalap, naisalakan

STA. CRUZ, Ilocos Sur – Nasarakan met laengen ti maysa kadagiti dua a naiwawa iti taaw a mangngalap a residente ditoy nga ili.

Nasarakan dagiti mangngalap ni Arnel Dolliente, residente iti Barangay Dili, ditoy nga ili, nga agkatangkatang iti kabaybayan a sakup ti Cabugao, Ilocos Sur ket impanda ti biktima iti Suero Clinic and Hospital gapu ta nakapsut unayen iti bisin ken wawna iti tallo nga aldaw a pannakaiwawana iti taaw.

Segun ken ni Maribel Sarmiento, karaman ti katuganganna a ni Dolliente ken ti kalugaranda a ni Putsong Agualin kadagiti mangngalap iti lugarda a nagpataaw idi Pebrero 27, 2008. Nagsubli dagiti mangngalap gapu ta nadawel ti baybay, ngem saan metten a nakaawid da Dolliente ken Agualin.

Kinuna ni Sarmiento a gapu iti saan met laengen a panagsubli dagiti dua, madandanagandan ken nagamakda nga addan napasamak kadakuada.

Iti maikatlo nga aldaw, adda dimmanon nga impormasion kadakuada nga adda nasarakanda a mangngalap a naitawtaw iti Cabugao, Ilocos Sur. Nakumpirmaranda a ni Arnel ti nasarakanda.

Kabayatanna, di pay nasarakan ni Agualin ket mapapati a natayen.

Nakaawid metten iti pagtaenganda ni Arnel kalpasan ti sumagmamano nga aldaw. (Danny Antalan)